Vunabend harrn wi de Polizei in de Bahn


Vunabend hett mien Bahn ’n beten länger bet tohuus bruukt. In Borgwedel harrn wi de Polizei to Gast. Mit dree Peterwagens stunnen de dor, söss Polizisten an’n Bahnstieg. Söss Mann, nee fief un een Fru. Weer wohl kort vör den Fierabend ween un sünst weer nich veel los, dor sünd glieks allemann kamen. Un de vertellen den Togföhrer, „dat düert bloots twee Minuten“. Dat sünd denn doch en poor mehr warrn. Wat weer passeert?

In Eidelstedt, dor wonehm de AKN anfangt, harr ik den Mann al sehn. Un in Quickborn möten wi rut, dat föhrt ja nich jeedeen Tog wieder bet Koldenkarken (Kaltenkirchen) un dor hebb ik em noch fraagt, wat den dor egentlich loos weer.

Götz George as Horst Schimanski
Horst Schimanski, Bild: (c) Harald Schrapers

He harr ’n Jack an, de so utsehg as vun de Polizei, man doch nich so ganz. Aber „Polizei“ weer dor kloor un düütlich to lesen. Un he dreeg de apen. Dat Hemd witt. Dorto en hellbrunen Ledderkuffer, en Schippermütz un Dree-Daag-Boort. Un mööd sehg he ok ut. All tosamen so en beten as Schimanski in sien Tatoort.

Un denn weer dor so en hyperaktiven Mann, de ook meen, dat dat so en beten merkwürdig utsehg. In Borgwedel vertell he denn de Beamten, „jo ik bün dat ween, ik hebb Se mit mien Mobiltelefon anropen.“ „Ja köönt Se mal mit rutkamen, dann köönt wi glieks Seehr Utsaag opnehmen.“ He meen nämlich, dat disse Mann in den Tog bloots so dee, as wenn he en Polizist weer, un dat is in Düütschland ja verbaden, mit en Polizeiuniform rümtolopen wenn een dat nich ist.

„Ja un Se“, sä en junge Polizistin to den Schimanski-Typen, „köönt Se ok mal mit rutkamen?“
„Nee, ik will egentlich nur na Huus“ anter de, un treck sien Dienstutwies ut de Tasch. „Ach, dat is en Koleeg“, meen de Polizistin. „Is allens goot“. De sünd denn weg un schrieven sik noch den Naam vun den hyperaktiven Fohrgast op.

In Quickborn vertell de Schimanski mi denn noch: Ik harr dat den jungen Mann al in Eidelstedt verkloort. Ik bün bi de Wasserschutzpolizei. Man de wull mi dat nich glöven. Uns Uniformen sünd heel nieg, de hebbt wi eerst dree Johr lang. Ik kann dor nix för, dat de anners utsüht as sünst bi de Polizei, ik hebb mi dat nich utsöcht. Un de Schippermütz, de höört dor eben to, to uns Uniform. Un wieldat ik em dat allens al verkloort harr, kriegt de wohl vun de Polizei noch en Strafmandat.

Born vun dat Bild:

Polizei: Image by BodyWorn by Utility from Pixabay

Götz George as Horst Schimanski.
Via http://de.wikipedia.org/wiki/Datei:HorstSchimanski.jpg, cc-by-sa 2.5 vun Harald Schrapers · horstschimanski.info

aktuelle Artikel