Keen Schachspelen bi Tante Meier

SchachNa sowat. Dor hebbt se en Schachspeler vun de Schach-Bundsliga sparrt. Woso? Falko Bindrich, en Schach-Grootmeester, is merrn in de Partie to Tante Meier gahn un sien Gegner hett em denn vörsmeten, dat he dor op sien Smartphone nakeken hett, wat sien Schachprogramm ’n goden Raat för em hett.

Wat is passeert?

De Scheedsrichter kunn sik dat ok vörstellen un so hebbt se den Bindrich op dat Klo naspioneert (!), man keen Bewies funnen, dat he dor mit sien Handy speelt hett. Un so hebbt se denn Bindrich sien Handy hebben wult, um dor mal sülvst natokieken. Man Bindrich hett dat nich rutgeven. He meen, so wiet kummt dat noch, dat he sien Handy mit all sien private Fotos un mit all sien Dokumenten vun sien Arbeit ut de Hand geven mutt. He meen ok, dat een ut sien Partie ja sehn kann, dat he nix nakeken harr, sünst harr he ja beter speelt as he dat daan harr. OK, he harr liekers wunnen, man sien Gegner schall sik nich so opregen, dat kummt ja vör, dat een mal en Partie verleert. Bi de ELO-Tall (en Tall, de meten deit, wo goot en Speler is) weern se ja nich so wiet utenanner.

Un denn hett de Scheedsrichter de Partie verloren geven un de Schachverband hett Bindrich för twee Johr sparrt, bloots wieldat he sien Handy nich rutgeven wull. Un Bindrich hett al seggt, dat se sik vör Gericht wedderdrapen deit.

De hele Geschicht gifft dat bi de TAZ. Un op disse Schachsiet finnt sik ok en lange Pressverklaren vun Bindrich.

In mien aktive Tiet as Schachspeler (dat is al lang her, dor bün ik noch to School gahn), hebbt wi so wat nich hett. Dor geev dat disse Smartphones noch nich. Dor hebbt wi eenfach bloots Schach speelt.

Heiko Evermann
Januar 2013

(Wöör: „to Tant/Tante Meier gahn“ = „auf Toilette gehen“)

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.