Halloween in Ellerau

Weitersagen

kuerbisVerleden Sünnabend weer dat wedder so wiet: Halloween.

Ik sitt in de tweete Etaasch an mien Reekner. Dat pingel an de Huusdöör. Ik stah op. As ik in de eerste Etaasch bün, pingelt dat wedder. Ik roop noch „bün ja glieks dor“. As ik an de Huusdöör bün, bullert dat al.
Dree Kinners in snaaksche Kledaasch sünd an de Döör un hebbt en egen Spröök praat. Tominnst kreativ, denk ik mi. Un se wullt Snoopkraam hebben. Ik segg, maakt wi glieks. Man vörher hebb ik noch en Fraag för jo. Wenn ji dat weten deiht, denn giff ik jo wat. Hüüt is Halloween. Un wat is vundag sünst noch?“

Een vun de Jungs meent: „Seehr Geburtsdag?“
„Nee“, meen ik.

Intwischen kiekt min ole Vadder üm de Eck, wat de Bulleree bedüden deit.

Dat bringt den Jung op en Idee: „Ah, hüüt is de Geburtsdag vun Seehrn Vadder?“
„Nee, ok nich. Dat is heel wat anners, wat hüüt Sien Geburtsdag hett.“
„????“
„Hüüt is Reformatschoonsdag. Hebbt ji dorvun al höört? Dat is de Burtsdag vun de evangeelsche Kark, Luther sien 95 Thesen, de Anfang vun de Reformatschoon!“

Een vun de dree kann sik en beten besinnen, dat dor wat weer. De tweete druckst rum. Un de drüdde, de meent „Ey, Kark, dat is so wat vun langwielig. Jümmers mutt een opstahn un singen.“

„Also ik gah dor geern hen. Freewillig.“ segg ik un haal den Snoopkraam.

Un so geiht dat denn den helen Abend wieder. Ik de Trepp hooch, wedder an mien Reekner. Bün meist dor, dor pingelt dat al wedder.
„Sööt oder Suur?“.
„Sööt“, segg ik. „Wat hebbt ji denn för mi?“
„Ne, wi wullt wat vun Se hebben!“.
„Ach so“, segg ik, un fraag wedder, wat hüüt sünst noch is, buten dat wi Halloween hebbt.

„Konfer… Ah, Konfermatschoonsdag“.
„Nee“, segg ik. „Dicht bi. Reformatschoonsdag. Un wat warrt dor fiert?“
„De düütsche Eenheit.“
„Nee. Dor warrt de Anfang vun de Reformatschoon fiert, de Anfang vun de evangeelsche Kark.“
„Evangeelsche Kark, dor hebb ik noch nienich vun höört.“
Au weia, denk ik mi.

Un so weer dat de helen Abend lang. Vun Reformatschoonsdag noch nienich wat höört. Bloots een Grupp von dree Deerns hett dat wusst. Dat mutt een fiern. Un dor hebb ik denn ok düchtig Snoopkraam rutgeven, mehr as bi de annern. Un de dree hebbt sik bannig freit.

Wöör:

  • verleden: vergangen/vorherig. Besonders in Formulierungen wie verleden Johr, verleden Maand. Achtung. Verleden Johr heißt nicht „vorletztes Jahr“, sondern „letztes Jahr“. Vorletztes Jahr wird anders formuliert, z.B. „vörvörig Johr“
  • Snoopkraam: Süßigkeiten
  • sik besinnen: sich erinnern
  • nienich: noch nie. Man findet auf Platt auch „nie“, aber das ist auch eine Nebenform von „nee“ (HD:neu). Und deshalb ist nienich weit verbreitet.

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.