De Telekom will mi wedder torüch

Weitersagen

GlasfaserlampeVerleden Dingsdag weern twee Lüüd bi uns an de Döör un wullen mi för de Telekom warven. Buten weer dat al düüster. Koolt weer dat un en beten Regen harrn wi ok. De twee deen mi al Leed.

De een fung denn an to vertellen: „Weet Se al, dat dat in Seehr Straat jetzt Glasfaser ok vun de Telekom gifft?“

Nee, dat harr ik nich wusst. Uns Huus is ja eerst twee Johr oolt un de hele Straat hett bloots Glasfaser un dat bloots vun Wilhelm-Tel ut Noordersteed.  En Kopperkabel gifft dat gor nich.

De Telekom an de Döör

He vertell denn ok, wat dat kosten schall, so per Maand. Nu harr ik nich so ut de Lamäng wusst, wat wi bi Wilhelm-Tel betahlt un fraag, wat dat denn mehr oder weniger is, wenn ik dat mit Wilhelm-Tel verglieken do.

„Weet ik nich“, meen he. Ik kiek em an, so mit en Fraagteken in mien Gesicht. „Nee“, vertell he, dat hangt ja ok dorvun af, wat se dor noch so tosätzlich an Paketen hebbt, so mit Pay-TV un so. Mit disse Anter weer ik nich so tofreden. All de Lüüd in uns Straat weern bi Wilhelm-Tel. Un wenn een sien Lüüd bi dit Weder op de Straat schickt, denn kann een de ok beter utrüsten, hebb ik mi dacht. Denn kann een ok weten, wat de Standardtarif bi Wilhelm-Tel kosten deit.

Wat nu? Ik sä, töövt se mal, ik söök dat man eben rut. Bün to mien Kontoordner, wöhl dor en beten. Ah, is bi de Telekom üm un bi veer Euro weniger. Dat weer ja gediegen. Aber Telekom? Dor bün ik al lang nich mehr, un ik weer froh, as ik dor weg weer.

„Ja wat heet dat denn?“, fraag ik. Wat is mit de Telefonanlaag vun Wilhelm-Tel, also nich mit uns egen Telefon, aber mit de Fritzbox, also mit uns Internet-Router, ISDN-Utgang, un mit den Ümsetter vun Glasfaser to den Kiekschapp. „Ja dat mutt allens rut, un torüch na Wilhelm-Tel. Un dat kriegt Se nieg vun de Telekom.“ „Oh dat Glasfaserkabel, mutt dat ok nieg?“ Nee, meen he, dat Glasfaserkabel, dat blifft, bloots de Endpunkt mut nieg. Ik seeg al de Lüüd mit de Bohrmaschien in uns Huusweertschoppsruum, mank all dat annere Elektrotüüg, wat dor al is. Un mien WLAN-Repeater in’n eersten Stock de is ok vun Fritz. „Never touch a running system“ heet dat in de Informatik. Will ik dat wirklich, dorför dat dat villicht en lütt beten billiger is?

He mark dat wohl ok un fraag mi direktemang „Kommt das für Sie überhaupt in Frage?“. Also wenn Se mi so direkt fragen deit… An de Huusdöör eerst mal nich. Ik fraag noch: „Köönt Se mi denn mal en Prospekt dorlaten, dann kann ik dat noch mal nalesen“.

He bladder in sien Ünnerlagen, wies mi en Stück Papeer un meen, nee, ik hebb hier bloots en Andragsformulor. Man se köönt dat ok allens in’t Internet nakieken, dor steiht dat ok allens binnen“

Ne, leve Telekom, so geiht dat nich, wenn Se mit mi en Geschäft maken wullt.

Un jetzt, wo ik dat allens opschrieven do, hebb ik dat ok noch mal in’t Internet nakeken, so as de Lüüd vun de Telekom mi dat vertellt hebbt. Dat is hier:
http://www.telekom.de/privatkunden/zuhause/internet-und-fernsehen

Un wat suert dorbi rut:

Telefon un Internet kost jüst so veel as bi Wilhelm-Tel. Dat is bloots so, dat dat för de eersten 12 Maanden en Rabatt gifft. Dat weer de Pries, den mi de Telekom an de Döör nöömt hett. Un dorför wullt se denn noch 70 EUR Anslussgebühr hebben. Un all de Telefontechnik in uns Huusweertschoppsruum rutsmieten un nieg maken.
All tosamen is dat also dürer as wenn allens so blifft as dat is, mit Wilhelm-Tel. Nee, leve Telekom, so wat bruuk ik nich.

Wöör:

Dingsdag: Dienstag
verleden: vorige, speziell in Wendungen wie verleden Week, verleden Johr, verleden Dingsdag
Kopper: Kupfer
Noordersteed: Norderstedt
Maand (Mehrtall: Maanden): Monat

Bild: Glasfaserkabel Public Domain ut de Wikimedia Commons

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.