Nu is dat Malöör passeert. Meist 97 Perzent vun de Inwahners vun de Halfinsel Krim wullt den Ansluss an Russland. Dat is bi dat Referendum rutsuert. Un 83% vun de Lüüd sünd hengahn un hebbt jemehr Krüüz maakt. Dat sünd mehr as bi uns bi de Bunnsdagswahl mitmaakt. Un egentlich is dat alles ok keen echte Naricht. Dat hebbt wi uns all denken köönt.
Un nu?
Kloor kann een dorbi rümmäkeln: Dat is allens to gau ween, de Lüüd hebbt keen Tiet to’t Nadenken hett. De Fragen op den Wahlzettel weern ok nich so dull.
Bloots stell di mal vör, dat allens weer jüst so ween as de Westen sik dat vörstellt harr. Weer dor wat anners bi rutsuert? Villicht harrn denn all de Ukrainers un all de Krimtataren ok mit afstimmt. Un denn? Denn weer dat jümmers noch en russische Mehrheit ween. En demokraatsche Mehrheit, üm dat nochmal op den Punki to bringen. Kannst nix mi maken.
Woso is dat egentlich passert?
De Mehrheit vun de Lüüd op de Krim, de snackt Russisch un de wullt ok to Russland tohören. Un de Westen? De hett veel Tiet un Geld investeert, de Lüüd vun de Ukraine to övertügen, dat se man en westlich Land warrt schüllt. Ja, Geld. 5 Millarden US-Dollar hebbt de USA utgeven, üm de Ukraine to helpen, demokraatsche Strukturen optoboon un üm ukrainische Polikers uttobillen, dat se gode westliche Politikers warrt, Lüüd, de so denkt, as de Westen sik dat wünscht.
Viktoria Nuland snackt Kloortext
Viktoria Nuland hett dat vertellt, un de mutt dat wohl weten, de arbeidt vör dat US-Butenministerium. (Link: http://www.informationclearinghouse.info/article37599.htm)
Wat hett se seggt:
„Since the declaration of Ukrainian independence in 1991, the United States supported the Ukrainians in the development of democratic institutions and skills in promoting civil society and a good form of government – all that is necessary to achieve the objectives of Ukraine’s European. We have invested more than 5 billion dollars to help Ukraine to achieve these and other goals.”
Un de Oosten vun de Ukraine?
Bloots in den Oosten vun de Ukraine, dor wonehm de Lüüd russisch snacken un wohl ok russisch denken deit, dor is disse Botschaft nich ankamen. In den westlichen Deel vun de Ukraine hebbt de USA un de EU denn ok jemehr Revolutschoon henkregen. Un nu is dat to laat. Nu kann een bloots noch de Schören insammeln un sik frein, wenn de Ukraine den Rest vun ehr Territorium beholen kann. De hebbt ja noch mehr Russen in’t Land, ok in en poor Rebeden mit russische Mehrheit.
Kosovo: de Präzedenzfall
Dat is noch nich so lang her, dor hett dat in den Kosovo en Referendum geven. De hebbt jemehr Unafhängigkeit verkloort. Un de Westen hett sik freit. Russland is dor dagegen ween. Un nu kriggt de Westen dat alles torüchbetahlt. Mit Zinsen.
Kannst nix bi maken.
Heiko Evermann
März 2014
Bild: Satellitenbild vun de NASA, public domain via Wikipedia
