Dezember. Buten is dat koolt warrn. Un wenn een dat kommodig hebben will, denn is’n Kaminfüer jüst dat richtige. Un dor hebb ik ok noch jüst de richtige Musik dorto. Dat Stück heet Áššogáttis un is vun de Sängersch Sofie Jannok.
De Spraak
Wenn een sik dat Stück anhören deit, denn is een Saak gau klor: dat is nich op Platt. Woso schriev ik denn dorvun? Un wat för een Spraak is dat egentlich? Dat Stück is op Noordsaamsch (Wikipedia). Dat is en Spraak vun en lütt Volk ut Lappland, vun de Samen. Un jümehr Spraak warrt man blots vun üm un bi 30.000 Lüüd snackt, un dat in en Rebeet, wat grötter is as Plattdüütschland. 30.000 Lüüd, dat mutt een sik mal vörstellen! Dör gifft dat Städer in Noorddüütschland, dor wahnt mehr Lüüd in disse Stadt as dat Lüüd gifft, de Saamsch snacken köönt!!!
Un doch hebbt se saamsche Musik henkregen. Op youtube gifft dat noch mehr vun Sofie Jannok un ok noch vun en poor annere Lüüd. Un dor hebb ik groten Respekt vör. So wenig Lüüd, un doch jümehr egen smucke Musik. Dat kann en Vörbild ween, ok för annere lütte Spraken. Un so hett dat denn doch wat mit Plattdüütsch to doon.
Dat Leed
Üm wat geiht dat nu in Áššogáttis? In’t Internet gifft dat en engelsche Översetten vun den Text.
Dat geiht üm de Gloot, üm en Füer buten ünner de Heven, üm dat Noordlicht, üm de Natur. Un in de tweete Strooph geiht dat üm de Kraft, de een dorvun för sien egen Leven ruttrecken kann. En schönen Text, de mi richtig goot gefallen deit. Dat is Kultur. Un so stell ik mi plattdüütsche Kultur ok vör. Un ja, ik weet, dat gifft dat al, ok op Platt. Blots de mehrsten Lüüd, de dat nich kennt, de denkt bi Platt toeerst an de Dööntjes. Un dat mööt wi verkloren, dat wi ok mehr hebbt. Dat mööt wi mehr bekannt maken. Privat Un op youtube un op Facebook.
Heiko Evermann
Dezember 2015
