De eerste Tourist in Ellerau

Urban_backpacking_200pxIk weer jüst an’t Arbeiden, vun to Huus, wat ik af un an maken kann, so as Programmerer. Un as ik hoochkiek vun mien Schrievdisch, ut mien Finster, dor seh ik en Rucksacktouristen. Mit den sworen Gang vun en Backpacker as dat op Ingelsch heten deit. Dat kenn ik noch. In Niegseeland hebb ik dat faken sehn, dat weer 2001. Ach, dat weer schöön dor. Ik kiek wedder op mien Reekner. Un as ik so över mien Programm nadenken dei, dor fangt achtern in mien Programmererbrägen wat an to arbeiden.

Weiterlesen

Dree Mathematikers gaht na den Dörpskrog

200px-Irish_pubDree Mathematikers gaht na den Dörpskrog. De Kröger fraagt: wüllt ji all wat to drinken hebben?

De eerste Mathematiker antert: Weet ik nich.

De tweete Mathematiker seggt: Weet ik ok nich.

De drüdde seggt jo.

Un wenn ji ok Mathematikers sünd, denn is hier de richtige Steed, üm to lachen… Woso? För de Lüüd, de sik nich to de Mathematikers tellt, un de ok lachen wüllt, schall ik dat verkloren.

Weiterlesen

Vunabend harrn wi de Polizei in de Bahn

Götz George as Horst Schimanski

Horst Schimanski, Bild: (c) Harald Schrapers

Vunabend hett mien Bahn ’n beten länger bet tohuus bruukt. In Borgwedel harrn wi de Polizei to Gast. Mit dree Peterwagens stunnen de dor, söss Polizisten an’n Bahnstieg. Söss Mann, nee fief un een Fru. Weer wohl kort vör den Fierabend ween un sünst weer nich veel los, dor sünd glieks allemann kamen. Un de vertellen den Togföhrer, „dat düert bloots twee Minuten“. Dat sünd denn doch en poor mehr warrn. Wat weer passeert?

Weiterlesen

Urlaub in England

Hinnerk fragt Fiete: „Du Fiete, wat maakst Du dissen Sommer?“
„Ik fohr na England.“
„Mit ’n Fleger?“
„Nee, ik will mien Auto dorbi hebben.“
„Auto? Weetst du al, dat de Lüüd in England op de annere Siet fohrt?“
„Wat meenst Du mit op de annere Siet?“
„Kiek mal, wi fohrt doch op de Straat op de rechte Siet. Man in England fohrt de Lüüd op de linke Siet.“
„Gediegen…“

En poor Daag later meent Fiete to Hinnerk:
„Du, ik hebb mi dat överleggt. Ik nehm na England doch den Fleger.“
„Woso dat?“
„Du hest mi ja vertellt, dat de Lüüd in England op de linke Siet fohrt. Un denn hebb ik dat güstern mal op de B4 twischen Quickborn un Bad Bramstedt öövt. Nee, segg ik di, dat is mi veel to gefährlich.“

Dürer

Kunstünnericht: De Lehrer fraagt de Schölers, wat se em över Dürer vertellen köönt.

Jan meent: „De Milk is dürer warrn.“ Hinnerk weet: „De Kantüffeln sünd ok dürer warrn.“

Dor seggt de Lehrer: „Aber Kinder, ich meine doch den Albrecht“.

Meent Fiete: „Wat? Aldi is ok dürer warrn?“